ახალი ამბები

აჭარის უმაღლესი საბჭოს აცრემლებული დეპუტატები

19 თებერვალი, 2015 • • 1301
აჭარის უმაღლესი საბჭოს აცრემლებული დეპუტატები

ვასაძე ამბობს, რომ გაიგონა, თუ როგორ იგინებოდა აჭარის უმაღლესი საბჭოს წევრი დავით ბაციკაძე მათი მისამართით, ვინც 20 თებერვალს ჩანიშნულ სხდომაზე მისი და ალექსანდრე ჩიტიშვილის გადაყენებას დაუჭერს მხარს.

 

„მე ჩემი პოზიცია წინასწარ მაქვს დაფიქსირებული და, ბუნებრივია, მოვიაზრე თავი, რომ ვიყავი ამ გინების ადრესატი“, – ამბობს მედეა ვასაძე „ბათუმელებთან“. დავით ბაციკაძემ კი განაცხადა, რომ ხვალ აპირებს დაცვის სამსახურს სთხოვოს, ამოიღოს უმაღლესი საბჭოს დერეფნებში დაყენებული ვიდეოთვალის მასალები, რათა დაამტკიცოს, რომ მედეა ვასაძე სიმართლეს არ ამბობს.

სვეტლანა კუდბა და მედეა ვასაძე
სვეტლანა კუდბა და მედეა ვასაძე

 

„ეს ხდებოდა უმაღლესი საბჭოს შენობაში. ზოგადად, მე მივიღე ჩემს თავზე, იმდენად, რამდენადაც ის ამბობდა, ის, ვინც ხმას ჩემს წინააღმდეგ მისცემსო და ჩამოყალიბებული გინება იყო…“ – ამბობს მედეა ვასაძე, რომელმაც ტელეჟურნალისტებთან ისიც აღნიშნა, რომ მისი ოჯახის წევრების უსაფრთხოებაზე წუხს. „ბათუმელების“ კითხვაზე, რა აძლევს მას ამის საფუძლელს, მედეა ვასაძე ამბობს, რომ დავით ბაციკაძის ტექსტი იყო მუქარის: „ბუნებრივია, ეს აღიქმება მუქარად, – ადამიანს დაკარგული აქვს წონასწორობა, ახლა მთლიანად გამოსულია კონტროლიდან, ვეღარ აკონტროლებს საკუთარ თავს. ბუნებრივია, არა მარტო მე, არამედ ბატონი ჯემალ ფუტკარაძეც და ქალბატონი სვეტა კუდბაც გააკეთებს ალბათ ანალოგიურ განცხადებას, რომ ჩვენი უსაფრთხოების პრევენციისთვის უმაღლესმა საბჭომ მიიღოს ზომები“, – ამბობს მედეა ვასაძე.

 

მისივე თქმით, ხელისუფლება უმაღლესი საბჭოს წევრის, სვეტლანა კუდბას მოსყიდვას ცდილობს: „მე მგონია, რომ ქალბატონ სვეტას მოსყიდვის მცდელობაა. ადამიანი [სვეტლანა კუდბა] მთელი ორი წლის განმავლობაში აყენებდა გარკვეულ საკითხს საზოგადოებრივი ინტერესებიდან გამომდინარე და ამ საკითხს არ უკმაყოფილებდნენ და მე დღეს მაქვს პროექტი, ხელშეკრულებისა და მთავრობის თავმჯდომარის ხელმოსაწერი, რომელიც დღეს მისცეს სვეტლანა კუდბას: „წამობრძანდით, საკითხი გადაწყვეტილია უკვე და მოაწერეთ ხელიო“ და წამოიღო ქალბატონმა სვეტამ  ეს პროექტი და ერთ-ერთი ასლი მე მაქვს, რომელსაც ალბათ ხვალ გამოვაქვეყნებ. ეს არის პროექტი, როგორ სთავაზობენ მას საქველმოქმედო საქმიანობისთვის, მოგეხსენებათ, ქალატონი სვეტა მუშაობს მიუსაფარ ადამიანებთან, უსასყიდლოდ, 49 წლით, 300 კვადრატულ მეტრამდე შენობას. მე ვფიქრობ, ამ გართულებულ პოლიტიკურ ვითარებაში, ეს  გარკვეულწილად მისი მოსყიდვის მცდელობაა. ქალბატონი სვეტა გონიერი ადამიანია და ზოგადად აღმოჩნდა, რომ ღალატი არ არის თურმე გადამდები, ძალიან მყარად არის და ვნახოთ“, – ამბობს მედეა ვასაძე, რომელიც იმედოვნებს, რომ 20 თებერვალს დავით ბაციკაძისა და ალექსანდრე ჩიტიშვილის გადასაყენებლად საჭირო 11 ხმა უმაღლეს საბჭოში შეგროვდება.

 

აჭარის მთავრობაში „ბათუმელებს“ დაუდასტურეს, რომ გამზადებულია ხელშეკრულების სამუშაო ვერსია, რომლის მიხედვითაც დეპუტატ სვეტლანა კუდბასთვის იგეგმება ქონების გადაცემა. ხელშეკრულება არც ერთი მხარის მიერ არ არის ხელმოწერილი. მთავრობის ინფორმაციით, სვეტლანა კუდბა საქველმოქმედო მიზნებისთვის ქონების გადაცემას ორი წელია ითხოვდა. 

 

18 თებერვალს აჭარის უმაღლეს საბჭოში ფრაქცია „ქართული ოცნების“ დახურული სხდომიდან დეპუტატი სვეტლანა კუდბა ატირებული გამოვიდა. შეხვედრა უმაღლესი საბჭოს რიგგარეშე სხდომას უკავშირდებოდა, რომელიც 20 თებერვალს, 17:00 საათზე არის ჩანიშნული. სხდომაზე ოპოზიციის მიერ დაყენებულ მოთხოვნას უნდა უყარონ კენჭი, რომელიც უმაღლესი საბჭოს თავმჯდომარის მოადგილის, დავით ბაციკაძისა და საფინანსო-ეკონომიკური კომისიის თავმჯდომარის, ალექსანდრე ჩიტიშვილის თანამდებობიდან გადაყენებას შეეხება.  

 

უმაღლესი საბჭოს ოპოზიციის წევრების განცხადებით, სვეტლანა კუდბაზე თანაპარტიელები ზეწოლას ახორციელებდნენ, რადგან დასახლებული დეპუტატების თანამდებობიდან გადასაყენებლად 11 ხმაა საჭირო.   

 

თანაპარტიელებისგან პოლიტიკური ნიშნით ზეწოლის ფაქტს სვეტლანა კუდბა „ბათუმელებთან“ საუბარში არ ადასტურებს. დეპუტატი ამბობს, რომ მისი ცრემლები პირად თემას უკავშირდებოდა და არა პოლიტიკას.  

 

 „ჩემი ცრემლები პოლიტიკას არ უკავშირდებოდა, ჩემი პირადი საქმე მოვყვე?! უხერხულია.  არ შეიძლება ჩემს მეგობრებს ჩემი პირადი გაჭირვება ველაპარაკო? მეუღლე ავად მყავს და მივდივარ-მოვდივარ და ავყევი ემოციებს“ – ამბობს ის „ბათუმელებთან“ საუბრისას.  

 

 რა მოხდა ფრაქციის სხდომაზე და უკავშირდებოდა თუ არა დეპუტატის ცრემლები რიგგარეშე სხდომაზე ჩანიშნულ საკითხებს? ამ ინფორმაციის გადასამოწმებლად  „ბათუმელები“  ფრაქცია „ქართული ოცნების“  თავმჯდომარეს, აკაკი ძნელაძესაც დაუკავშირდა.

 

 „სვეტა არ ტიროდა, უბრალოდ ქალური ემოციით აუჩუყდა გული, რომ დაიღალა ამდენი იწილო-ბიწილოთი და ვერ გაერკვა. ჩემი აზრით, პოლიტიკას ცივი გონება სჭირდება და არაფერი არ არის აქ საოცარი. ამას შემდეგ ვინ რა ყურს ან ხელს გამოაბამს,  სხვა საკითხია“.

 

„მშვიდად“ ელოდება 20 თებერვალს მოვლენების განვითარებას დავით ბაციკაძე. „თუ ნაციონალური მოძრაობის რვა წევრს მხარს დაუჭერს სამი დეპუტატი, ეს შესაძლებელი იქნება. ქალბატონმა მედეამ განაცხადა ამის შესახებ, რომ მხარს დაუჭერს ნაციონალურ მოძრაობას, ბატონი ჯემალი ბოლომდე ვერ ჩამოყალიბდა, მაგრამ გვითხრა პრინციპში, რომ ის აპირებს მხარდაჭერას და თუ კი ვინმე დაემატა მესამე, ეს  შესაძლებელია, მაგრამ ეს არაა აჭარის მოსახლეობის სურვილი და ისინი ხელოვნურად ცვლიან შედეგს, რაც დადგა არჩევნების შედეგად ორი წლის წინ აჭარის ყველა მუნიციპალიტეტში.  მაგრამ მინდა დავპირდე მათ, რომ  ეს რევანში არ გამოვა, დადგება ვადამდელი არჩევნების საკითხი. მურმან დუმბაძე, მედეა ვასაძე, ჯემალ ფუტკარაძე და „ნაციონალური მოძრაობა“ რევანშისტები არიან, ესაა სიმართლე.“

 

დავით ბაციკაძე უარყოფს მედეა ვასაძის მიმართ არათუ მუქარას, არამედ გინებასაც კი. ის ამბობს, რომ მედეა ვასაძეს მისგან არავითარი საფრთხე არ ელის: „მოვითხოვ ვიდეოთვალებს და ერთი სად, რა დროს მოისმინა, როგორ იდგა, ან თუკი ყურს ადებს კარებს, ეს რა საქციელია – ეს სხვა თემაა. ძალიან ბევრი ადამიანი იყო იქ და შეგიძლიათ მათ ჰკითხოთ. ეს არის იმისთვის, რომ გაამართლონ თავიანთი უმსგავსო ქმედება, ის, რაც ჩაიფიქრეს, რომ პოლიტიკურ რევანშს აპირებენ და ხელისუფლების შეცვლას“. 

მასალების გადაბეჭდვის წესი