აქციის მონაწილეები აცხადებდნენ, რომ ისინი არც ერთ ორგანიზაციას არ მიეკუთვნებიან და შეკრება თავიანთი ინიციატივით გადაწყვიტეს.
“სამეგობრო ვართ სხვადასხვა უნივერსიტეტებიდან, უბნებიდან,”– გვითხრა აქციის მონაწილემ, რევაზ რევაზაშვილმა.
საპროტესტო აქციის ორგანიზატორი, ირაკლი ონიანი ამბობს, რომ ტექნიკური უნივერსიტეტის სტუდენტია და სხვა მონაწილეებიც სხვადასხვა უნივერსიტეტების სტუდენტები არიან. მისივე თქმით, ეს ახალგაზრდები თავიანთი ინიციატივით შემოუერთდნენ.
“მივმართავთ საბერძნეთის მთავრობას, ვთხოვთ, რომ გადმოგვცეს მკვლელი დათა ახალაია. ახალაია არის ის ადამიანი, რომელიც ატერორებდა საქართველოში ბიზნესმენებს, კლავდა ახალგაზრდებს, არბევდა მშვიდობიან მოქალაქეებს. ამ 9 წლის განმავლობაში, რაც დათა ახალაიამ გააკეთა და მისმა თანაგუნდელებმა ნაციონალური მოძრაობიდან, მოვითხოვთ, რომ დაისაჯონ, გაასამართლონ და ციხეში აღმოჩნდნენ,“– განაცხადა ირაკლი ონიანმა.
“9 წელსა” და “სამართლიანობის აღდგენაზე” საუბრობდა რევაზ რევაზაშვილიც:
“ეგ უნდა იჯდეს ციხეში იმ პატიმრებთან ერთად, ვისაც აწამებდა. უნდა მიეცეს პასუხისგებაში, რა თქმა უნდა, ამით უნდა დაიწყოს სამართლიანობის აღდგენა, რასაც ჩვენ ვითხოვთ ამდენი ხანი, ქართველი ხალხი ითხოვს და 9 წლის განმავლობაში ელოდებოდა სამართლიანობა აღდგენილიყო და რეჟიმი გასამართლებულიყო,”– განაცხადა მან.
საბერძნეთში კონსტიტუციური უსაფრთხოების დეპარტამენტის ყოფილი ხელმძღვანელი დათა ახალაია 2014 წლის თებერვალში ყალბი ტურისტული საბუთის დამზადების ბრალდებით დააკავეს. საბერძნეთის მხარისთვის დამატებითი ინფორმაციის მიწოდების შემდეგ საქართველოს მთავარი პროკურატურის შუამდგომლობის საფუძველზე ახალაიას ექსტრადიციის საკითხი განიხილეობოდა. საქართველოში დათა ახალაიას წინააღმდეგ გამოძიება რამდენიმე მუხლითაა დაწყებული, თუმცა 16 ოქტომბერს საბერძნეთის სასამართლომ დათა ახალაიას საქართველოში ექსტრადიციაზე უარი თქვა.
აქციის ორგანიზატორის, ირაკლი ონიანის თქმით, საპროტესტი აქციები გაგრძელდება, სანამ საბერძნეთი საქართველოს დათა ახალაიას არ გადმოსცემს. მისი თქმით, შემდეგი აქცია დაახლოებით 1 კვირაში გაიმართება.
