აღნიშნული სერვისი მოქალაქეებს საშუალებას აძლევს, დააფიქსირონ მათთვის მნიშვნელოვანი ფაქტი და მიიღონ შესაბამისი ოქმი, რომელსაც მტკიცებულად გამოიყენებენ.
მოქალაქის მიერ ფაქტის დადასტურების თხოვნით აღსრულების ბიუროსთვის მიმართვის შემდეგ აღმასრულებელი ადგილზე აფიქსირებს კონკრეტულ სიტუაციას – ფაქტს; აღწერს ფაქტებს ოქმში, რომელიც თავისუფალია რაიმე შეფასებისაგან; გამოიყენებს ტექნიკურ მოწყოფილობებს, იღებს ნიმუშებს, როდესაც ეს აუცილებელია და დაურთავს ყველა მიღებულ მასალას ოქმს, რომელიც ამტკიცებს ფაქტის არსებობას.
„ფაქტების კონსტატაციის“ სერვისი მნიშვნელოვნად შეამცირებს სასამართლო პროცესების ხანგრძლივობას მტკიცების სტადიის ხარჯზე; ხელს შეუწყობს ინტელექტუალური საკუთრების დაცვის გაძლიერებას და მოახდენს უფლებათა წინასწარ განზრახული დარღვევის პრევენციას”, – აცხადებენ აღსრულების ეროვნულ ბიუროში.
ფაქტების კონსტატაციის სერვისით მოსახლეობას შეუძლია ისარგებლოს: ქონების გაქირავებამდე მისი მდგომარეობის ასახვისათვის; სამეზობლო დავებისას – წყლის ჩამოშვებისას, საერთო სარგებლობის კიბით, სხვენით ან გზით სარგებლობის ხელისშეშლის შემთხვევაში; ჩუქების; გაყრის; ქონების გაყოფის; მემკვიდრეობით მიღების დროს ქონების სრული ინვენტარიზაციისათვის; შესრულებული სამუშაოს აღწერისთვის, მაშინ, როდესაც დამზადებული ნივთი ან საქონელი არ აკმაყოფილებს კონტრაქტის პირობებს; საავტორო უფლებების დაცვისათვის; პირატული პროდუქციის გაყიდვის დაფიქსირებისათვის; განქორწინების პირობების შეუსრულებლობისას; სტიქიური უბედურების ან სხვა სახის ავარიულ სიტუაციებში ზარალის შესახებ დადასტურებული ფაქტის დასადგენად; დაკვეთის შესრულების დროში უმიზეზოდ გაწელვისას და ა.შ.
ანალოგიური სერვისი უცხოეთში აპროპირებული მეთოდია და მრავალ ქვეყანაში (მათ შორის საფრანგეთი, ბელგია, ჰოლანდია, ლიტვა, ტუნისი) გამოიყენება, როგორც მტკიცებულება სასამართლო პროცესზე.