ვერა ქობალიას და აჭარის მთავრობაში მუშაობს

23 წლის ნინა ქობალია აჭარის მთავრობის აპარატის თანამშრომელია. ეკონომიკისა და მდგრადი განვითარების მინისტრ ვერა ქობალიას დის სამუშაო კაბინეტი აჭარის ტურიზმის დეპარტამენტშია.

იგი აპარატის სპეციალური წარმომაგენელია ამავე დეპარტამენტში.მისი თანამდებობაა -საზოგადოებასთან ურთიერთობის სპეციალისტი. ”რეალურად ჩემი ფუნქცია აჭარაში ტურიზმის „პრომოუშენი“ და რეკლამაა. „ივენთების“ დაგეგმვას ვხელმძღვანელობ. ინტერნეტში კი “არტიკლებს” ვწერ, რომ მოვიზიდოთ ტურისტები ბათუმში”.

მას სოციალურ ქსელ  ”ფეისბუქზე” ახალი გვერდი აქვს გახსნილი, რომელსაც  “ბათუმი ივენთი” ჰქვია.

ნეტგაზეთის კითხვაზე, თუ როგორ  დაიწყო ამ თანამდებობაზე მუშაობა, გვპასუხობს, რომ დაწერა განცხადება და წარადგინა საპროექტო წინადადებები, რის გაკეთებას აპირებდა. ამის შემდეგ კი მოეწონათ და აიყვანეს სამსახურში:  ”მარტში ვიყავი ჩამოსული კანადიდან და ძალიან მომეწონა ბათუმი, გამოცდები მქონდა ჩასაბარებელი და მაშინ  ვერ დავრჩი.”
რა წვლილი მიუძღვის მინისტრ დას ნინას კარიერაში.?  -ამბობს, რომ მისი და, ძირითადად, რჩევებით შემოიფარგლება: ”ხშირად მინდა ვნახო ჩემი და, მაგრამ დაკავებულია და ბათუმში ვერ ჩამოდის”

აჭარის მთავრობის ყველაზე ახალაგზარდა თანამშრომელს ვანკუვერის უნივერსიტეტი აქვს დამთავრებული. როგორც თავად ამბობს, ურთიერთობის სპეციალისტია.

მთავრობის აპარატის საზოგადოებასთან ურთიერთობის ახალი სპეციალისტი ამ ეტაპზე დიჯეი მაია ქეის კონცერტის ორგანიზებითაა  დაკავებული.  ამბობს,  რომ დატვირთული დღის გრაფიკი აქვს. დატვირთული დღის გრაფიკის ჩინოვნიკი ხელფასის რაოდენობას საიდუმლოდ ტოვებს.

ნინა ქობალია ბათუმში  ახალი ბულვარის განაპირას,  კობალაძის ქუჩაზე, ნაქირავებ ერთოთახიან ბინაში ცხოვრობს. ამბობს, რომ ბინა პატარაა, მაგრამ მას აკმაყოფილებს. აგვისტოსთვის კი მშობლებს ელოდება კანადიდან. ეკონომიკისა და განვითარების მინისტრის მშობლები შვებულების გატარებას ბათუმსა და ზუგდიდში აპირებენ.

ვერა და ნინა ქობალიების მამას კანადაში პურის ბიზნესი აქვს. ნინა 9 წლის იყო, როცა ოჯახმა საქართველო დატოვა.