“ეს ყველაფერი ხდება იმ დროს, როცა პრაქტიკულად ჩვენ თვალწინ ფორმირდება ახალი წესრიგი. როდესაც უკრაინის მოვლენების და სამგზავრო თითმფრინავის ჩამოგდების გამო, ჩვენ თვალწინ ჩნდება ახალი წყალგამყოფი, რომლის ერთ მხარეს დგას დემოკრატიული მსოფლიო, ხოლო მეორე მხარეს დგას რუსეთი. ამ დროს საქართველოს ხელისუფლება დგამს ნაბიჯს, რომლის წინააღმდეგაც მას დაჟინებით აფრთხილებდნენ ჩვენი მთავარი მოკავშირეები, დგამს ნაბიჯს, რომელსაც დაჟინებით ეწინააღმდეგებოდა აშშ და ევროკავშირი. კარგად უნდა გვესმოდეს, რომ ეს ნაბიჯი ჩვენ ჩვენი მთავარი მოკავშირეებისგან გადაგვიყვანს წყალგამყოფის მეორე მხარეს, იქ სადაც არის რუსეთი. ერთადერთი მხარე, რომელიც ამ ნაბიჯს შეხვდა მოწონებით, რუსეთი და ვლადიმერ პუტინია”, – განაცხადა ბაქრაძემ სპეციალურ ბფრიფინგზე. 

მისისვე თქმით ყოფილი პრეზიდენტისთვის წინასწარი პატიმრობის შეფარდება გაართულებს საქართველოს ევროკავშირსა და ნატოში ინტეგრაციას, ხოლო დაზარალებული ევროინტეგრაციის პროცესს, საქართველოს ყველა მოქალაქე იგრძნობს. 

შეგახსენებთ, რომ 1 აგვისტოს თბილისის საქალაქო სასამართლომ საქართველოს ყოფილ პრეზიდენტ მიხეილ სააკაშვილს ბრალდების მხარის მოთხოვნა დააკამყოფილა და წინასწარი პატიმრობა შეუფარდა. პროკურატურამ საქართველოს ყოფილ პრეზიდენტს მიხეილ სააკაშვილს ბრალი 28 ივლისს წარუდგინა. პროკურატურის ინფორმაციით “საქმე ეხება 7 ნოემბერს მომიტინგეთა დარბევას, ტელეკომპანია “იმედში” შეჭრას და არკადი პატარკაციშვილის ქონების დანაშაულებრივად ხელში ჩაგდებას”