ახალი ამბები

საქართველოში წამლის ხარისხის სისტემური კონტროლი იწყება

23 სექტემბერი, 2015 • • 1034
საქართველოში წამლის ხარისხის სისტემური კონტროლი იწყება

საქმე ისაა, რომ 2014 წელს ევროკავშირთან ხელმოწერილი ასოცირების ხელშეკრულების შესასრულებლად ქვეყანამ გარკვეული რეგულაციები უნდა მიიღოს, მათ შორის ჯანდაცვის სფეროში.

 

როგორც ჯანდაცვის სამინისტროში აცხადებენ, ამ მიმართულებით, განსაკუთრებით სამკურნალო საშუალებებთან დაკავშირებით, სამინისტრო გეგმავს “წამლის კანონში” და სხვა რეგულაციებში შესწორებების შეტანას, რათა წამლის რეგისტრაცია და ლიცენზირება ევროპული სტანდარტების შესაბამისად განხორციელდეს და შედეგად მომხმარებლამდე გარანტირებულად მხოლოდ ხარისხიანი და იმავედროულად ხელმისაწვდომი მედიკამენტები მივიდეს. 

 

დღეს, 23 სექტემბერს დაავადებათა კონტროლის ცენტრში გაიმართა საერთაშორისო კონფერენცია თემაზე – სამკურნალო საშუალებების ხარისხი. საქართველოს ჯანდაცვის უწყებების ხელმძღვანელობის გარდა, კონფერენციას საერთაშორისო საკონსულტაციო კომპანია “გლობალური ალიანსის” (GAHSC) პრეზიდენტი და ექსპერტი ესწრებოდნენ. სწორედ “გლობალური ალიანსი” ეხმარება საქართველოს წამლის ხარისხის გაუმჯობესებაში.  “გლობალურ ალიანსთან” საქართველოს მთავრობამ აპრილში მოაწერა ხელი შეთანხმებას, რომლის მიზანიც ქვეყნის ჯანდაცვის სისტემის ევროპულ სტანდარტებთან შესაბამისობაში მოყვანაა. 

 

როგორც ჯანდაცვის მინისტრმა, დავით სერგეენკომ დღევანდელ კონფერენციაზე განაცხადა, წამლის ხარისხის კონტროლის ერთიანი სისტემა არ არსებობდა აქამდე და მხოლოდ ეპიზოდურად ხორციელდებოდა.

 

“სამწუხაროდ, ჯანდაცვის სისტემაში  ხარისხის კონტროლის კომპონენტი პრაქტიკულად არ იყო, ან ძალიან სუსტად იყო წარმოდგენილი, თუმცა ასეთი სისტემის შემქნა მხოლოდ გამართული და ჯანდაცვის მძლავრი სისტემის ქვეყნებს შეუძლიათ. იმედი მაქვს, ეს ჩვენთან მალე მოხდება, ვინაიდან წამლის ხარისხი ერთ-ერთი მნიშნველოვანი ფაქტორია ხარისხიან ჯანდაცვაში”, – აცხადებს მინისტრი.

 

მისივე თქმით, ამ კუთხით ამჟამინდელი სამუშაო ითვალისწინებს გამჭვირვალე, ხარისხიანი და კონკურენტუნარიანი გარემოს შექმნას, რომელიც მიმზიდველს გახდის ქართულ ფარმაცევტულ ბაზარს სხვა მოთამაშეებისთვის. ეს კი, პირველ რიგში, როგორც მინისტრი ამბობს, შესაბამისი საკანონმდებლო რეგულაციების მიღებით იქნება შესაძლებელი. 

 

“პირველ რიგში საკანონმდებლო ბაზა უნდა გაუმჯობესდეს საქართველოში. ჩვენ გვერდში ვუდგავართ სამინისტროს ამ საკითხში და რეგულაციების გაუმჯობესებაზე ვმუშაობთ. როდესაც წამლის ხარისხის კონტროლის პროცედურები დაცულია და რეგულაციები სწორად სრულდება, ეს იმას ნიშნავს, რომ შესაძლებელია, ხარისხიანი წამალი იაფი იყოს”, – აცხადებს გლობალური ალიანსის პრეზიდენტი, ჟან ელი მალკინი. 

მასალების გადაბეჭდვის წესი