საქართველოს პრემიერ მინისტრის ბრძანებით, კულტურისა და ძეგლთა დაცვის სამინისტროს წერილის საფუძველზე მთავრობის სარეზერვო ფონდიდან 59 330 ლარი გამოიყო მომღერალ ნანი ბრეგვაძის შემოქმედებითი საღამოს ნაწილობრივ დასაფინანსებლად.

მომღერალმა 2015 წლის 4 იანვარს კონცერტი კი მთლიანად მიუძღვნა საქართველოს კათოლიკოს-პატრიარქს, დაბადების დღის იუბილესთან დაკავშირებით. სარეზერვო ფონდიდან თანხები გამოიყო ჰონორარებისთვის – 38 500 ლარი, ეკრანისთვის – 6 000 ლარი, სცენის მოწყობისთვის 10 000 ლარი და სხვა ხარჯების დასაფარად. აღნიშნული კონცერტის ღირებულება კი მთლიანობაში 90 130 ლარი იყო. ბილეთის ფასი კი 5-დან 70 ლარამდე.

საქართველოს მთავრობის 2014 წლის სარეზერვო ფონდიდან რელიგიური ორგანიზაციების დასაფინანსებლად სულ 5 042 000 ლარი გამოიყო. აქედან 3 500 000 ლარი ისლამური, იუდეური, რომაულ-კათოლიკური და სომხური სამოციქულო აღმსარებლობის რელიგიური გაერთიანებებისთვის, ხოლო 1 542 000 ლარი საქართველოს საპატრიარქოსთვის. საქართველოს 2014 წლის ბიუჯეტიდან საპატრიარქოსთვის ცალკე 25 მილიონი ლარი იყო გამოყოფილი. 25 მილიონია გამოყოფილი საპატრიარქოსთვის მიმდინარე წლის ბიუჯეტშიც.