ახალი ამბები

ნანუაშვილი: “განსხვავებულ აქცენტებში” გასული მასალა პროკურატურამ უნდა გამოიძიოს

23 სექტემბერი, 2014 • • 938
ნანუაშვილი: “განსხვავებულ აქცენტებში” გასული მასალა პროკურატურამ უნდა გამოიძიოს

ამ საკითხზე სახალხო დამცველი უჩა ნანუაშვილი სპეციალურ განცახდებას ავრცელებს: 

 

“2014 წლის 20 სექტემბერს ტელეკომპანია „რუსთავი 2–ის“ ეთერში, გადაცემაში „განსხვავებული აქცენტები“ გავიდა აუდიოჩანაწერები, რომლის მიხედვითაც, სავარაუდოდ, სასჯელაღსრულების დაწესებულებაში მყოფი პატიმრები ახერხებენ ტელეფონით დაუკავშირდნენ ერთმანეთს და სხვადასხვა საკითხებზე ისაუბრონ, მათ შორის, როგორც ჟურნალისტი ასკვნის, ე.წ. „მაყურებლის“ დანიშვნაზე და ე.წ. „ობშიაკის“ შეგროვებაზე. „პატიმრობის კოდექსი“ ზუსტად განსაზღვრავს სასჯელაღსრულების დაწესებულებებში მოთავსებულთა პირთა მიერ ტელეფონით თუ კომუნიკაციის სხვა საშუალებებით სარგებლობის წესებს, რომელთა დარღვევა შესაბამისი ადმინისტრაციული თუ სისხლის სამართლებრივ პასუხისმგებლობას იწვევს; ზემოაღნიშნულ გადაცემაში გაშუქებული სატელეფონო ჩანაწერები, ასევე, შეიძლება შეიცავდეს სისხლის სამართლის სხვადასხვა დანაშაულის ნიშნებს” – ნათქვამია ნანუაშვილის განცახდებაში. 

 

საქართველოს სახალხო დამცველი მიიჩნევს, რომ საქართველოს მთავარმა პროკურატურამ დაუყოვნებლივ უნდა ჩაატაროს გამოძიება ზემოაღნიშნულ გადაცემაში გასული მასალების შესახებ. გამოძიების შედეგად ამომწურავად უნდა გაეცეს პასუხი შემდეგ შეკითხვებს: არის თუ არა ავთენტური გადაცემაში გასული თითოეული ჩანაწერი, დადგინდეს საუბარში მონაწილე თითოეული პირის ვინაობა და როდის განხორციელდა აღნიშნული საუბრები.

 

ყოველივე ზემოაღნიშნულის გათვალისწინებით, ასევე, ამ საკითხისადმი მაღალი საზოგადოებრივი ინტერესის გამო, საქართველოს სახალხო დამცველი იმედოვნებს, რომ საქართველოს მთავარი პროკურატურა უახლოეს დღეებში მას და საზოგადოებას მიაწოდებს სრულ ინფორმაციას ამ განცხადებაში დასმულ ყველა საკითხზე.

უჩა ნანუაშვილი
უჩა ნანუაშვილი

მასალების გადაბეჭდვის წესი